Ndërsa pritshmëritë e konsumatorëve ndryshojnë dhe rregullat e reja marrin formë, Insurance Europe në raportin e ri vjetor të publikuar dje theksoi rolin e sektorit dhe nxiste angazhimin në diskutimet e politikave, si pjesë kyçe e përpjekjeve për të forcuar propozimin e vlerës së sigurimeve në shoqëri.
Nga qëndrimet në spital deri te riparimet në shtëpi, siguruesit mbështesin çdo ditë qytetarët dhe bizneset e Europës.
Ata mbrojnë shëndetin, të ardhurat, pasuritë dhe kursimet, duke mundësuar rimëkëmbjen, stabilitetin dhe planifikimin afatgjatë.
Siguruesit europianë ofrojnë mbrojtjen dhe qetësinë mendore për miliona njerëz dhe biznese anembanë Evropës.
Sektori po zhvillohet me ritme të shpejta për t’u përshtatur me transformimin digjital, ndryshimet klimatike dhe ndryshimet demografike.
Zgjidhje të reja, si sigurimi kibernetik dhe shërbimet e teleasistencës, tregojnë se si siguruesit po reagojnë ndaj rreziqeve të reja dhe nevojave të shoqërisë.
Sigurimi tanimë është i ndërthurur me jetën e përditshme. Ai ndihmon njerëzit të përgatiten për pensionin, të mbrojnë kursimet në kohë të pasigurta dhe të qëndrojnë të qëndrueshëm përballë rreziqeve të jetës.
Nga drejtimi i makinës, tek zotërimi i një shtëpie apo drejtimi i një biznesi – bota moderne, mund të thuhet me siguri, thjesht nuk do të mund të funksiononte pa sigurimin.
Mbrojtja e konsumatorit mbetet një përparësi kryesore, por më shumë rregulla nuk do të thotë gjithmonë rezultate më të mira. Një kornizë efikase dhe koherente është thelbësore për të mbështetur besimin dhe përballueshmërinë. Mbrojtja e konsumatorëve dhe thjeshtimi i rregulloreve duhet të ecin paralelisht. Njerëzit kanë nevojë për produkte të qarta, cilësore dhe informacionin e duhur, por edhe për një treg që nxit inovacionin, rrit konkurrencën dhe siguron qasje në mbulimin që u nevojitet.
Më shumë se kurrë, vlera e sigurimit duhet të njihet dhe të mbështetet në kontinent.
Industria europiane e sigurimeve, sipas raportit të Insurance Europe, përballet sot me pesë sfida kryesore që kërkojnë vëmendje të menjëhershme dhe veprim strategjik.
Së pari është thelbësore përmirësimi i konkurrueshmërisë përmes thjeshtimit të rregulloreve që aktualisht janë shpesh të ndërlikuara, të mbivendosura dhe që kufizojnë zhvillimin.
Së dyti, ndërtimi i një Bashkimi të vërtetë të Kursimeve dhe Investimeve do të mundësonte mobilizimin e kapitalit për tranzicionin klimatik dhe digjital, duke fuqizuar sigurinë financiare të qytetarëve.
Së treti, përballë rritjes së fatkeqësive natyrore, është jetike të forcohet bashkëpunimi publik-privat për të rritur qëndrueshmërinë klimatike dhe për të mbyllur boshllëqet në mbrojtje, sidomos për grupet më të pambrojtura.
Së katërti, inovacioni dhe teknologjitë si inteligjenca artificiale duhet të përdoren në mënyrë të përgjegjshme, me një rregullim të qartë që ruan besimin dhe të drejtat e konsumatorëve.
Së fundi, industria duhet të qëndrojë pranë shoqërisë, duke dëgjuar pritshmëritë e qytetarëve dhe duke siguruar shërbime të drejta, të aksesueshme dhe me vlerë reale për njerëzit, në mënyrë që të shihet si pjesë e zgjidhjes, jo e problemit.
