Rreziku nga zjarret në natyrë po rritet në frekuencë, intensitet dhe kosto, i nxitur nga ndryshimet klimatike, ndryshimet në përdorimin e tokës dhe zgjerimi i zonave urbane, sipas raportit “Emerging Risk Trend Talk” të Allianz Commercial.
Raporti paraqet faktorët kryesorë të rrezikut, ndikimet rajonale dhe pasojat për siguruesit, rregullatorët dhe bizneset.
Dëmet fizike dhe financiare nga zjarret janë të konsiderueshme.
Sipas të dhënave të Swiss Re, humbjet e siguruara në nivel global nga zjarret janë rritur nga 8.7 miliardë USD në vitet 2000 në 56.3 miliardë USD në vitet 2010.
Vetëm zjarret e vitit 2025 në Kaliforni vlerësohet të kenë shkaktuar 28 deri në 40 miliardë USD humbje të siguruara.
Përveç dëmeve direkte në prona, zjarret shkaktojnë edhe ndërprerje aktivitetesh, shkatërrim infrastrukture, probleme shëndetësore nga tymi, si dhe dëme mjedisore, përfshirë ndotjen e ajrit, ujit dhe shkatërrimin e habitateve natyrore.
Vitet e fundit janë shënuar zjarre edhe në zona që më parë konsideroheshin me rrezik të ulët, si në Kanadanë veriore, Skandinavi dhe Rusi. Zonat e ndërthurjes midis pyjeve dhe ndërtimeve të banuara (WUI) janë veçanërisht të ekspozuara.
Vetëm në SHBA, mbi 60,000 komunitete konsiderohen të rrezikuara nga zjarret në këto zona.
Zjarret ndikohen nga sasia e bimësisë djegëse, relievi dhe kushtet atmosferike.
Periudhat e thata, të ndjekura nga temperatura të larta dhe erëra të forta, rrisin rrezikun e zjarreve të mëdha – cikle që janë bërë më të zakonshme për shkak të ndryshimeve klimatike.
Rregulloret janë forcuar në disa rajone. Në Kaliforni (SHBA) dhe Viktoria (Australi), ofruesit e energjisë janë të detyruar të hartojnë plane menaxhimi për zjarret dhe të kontrollojnë vegjetacionin pranë aseteve të tyre.
Raporti i Allianz thekson se zbutja efektive e rrezikut nga zjarret kërkon strategji teknike dhe organizative.
Siguruesit dhe bizneset po kërkojnë gjithnjë e më shumë të vlerësojnë ekspozimin, të forcojnë modelet e rrezikut dhe të zbatojnë masa parandaluese, si në planin afatshkurtër ashtu edhe afatgjatë.
