Banka Qendrore Europiane (BQE) ka ulur normat e interesit për herë të parë në afro pesë vjet.
Banka mori kthesën e politikës monetare, duke ulur koston e huamarrjes, përpara homologëve të saj në SHBA dhe në Mbretërinë e Bashkuar.
Kjo lëvizje erdhi pasi përgjatë viteve të fundit bankat qendrore kishin rritur normat e interesit për të frenuar shtrenjtimin më të madh të çmimeve në një gjeneratë.
BQE uli normën e saj bazë të depozitave me një çerek pikë përqindjeje në 3.75% pas mbledhjes së këshillit të saj drejtues ditën e sotme në Frankfurt.
Presidentja e BQE-së, Christine Lagarde u shpreh muajin e kaluar se ishte “me të vërtetë e sigurt” se inflacioni i Eurozonës ishte nën kontroll pasi u ngadalësua nga një kulm mbi 10 për qind në 2022 afër objektivit të tij prej 2%. Megjithatë, të dhënat e publikuara javën e kaluar treguan se inflacioni u përshpejtua për herë të parë këtë vit në 2.6% në maj.
Kjo shifër e shtyu BQE-në të rrisë paksa parashikimet e saj për inflacionin për këtë vit dhe vitin e ardhshëm. Banka tha se inflacioni do të jetë mesatarisht 2.5% këtë vit, 2.2% në vijim dhe 1.9% në 2026.
Lëvizja e së enjtes erdhi një ditë pas një uljeje të ngjashme të normës nga Banka e Kanadasë dhe pas vendimeve të mëparshme për të lehtësuar politikën monetare nga bankat qendrore në Brazil, Meksikë, Kili, Zvicër dhe Suedi këtë vit.
Normat e interesit janë në nivelin më të lartë të 25 viteve, luke u luhatur 5.25 deri në 5.5%.
