Sezoni i uraganeve të Atlantikut të Veriut 2024, i cili pritet të fillojë më 1 qershor, parashikohet të jetë i pazakontë me katër deri në shtatë uragane të kategorisë 3 ose më shumë, sipas parashikimeve nga Administrata Kombëtare Oqeanike dhe Atmosferike e SHBA.
“Ky sezon është paralajmëruar si i pazakontë”, paralajmëroi shefi i NOAA Rick Spinrad gjatë një konference për shtyp.
“Agjencia nuk kishte parashikuar kurrë më parë një numër kaq të madh uraganesh të fortë”, tha ai.
Këto parashikime lidhen kryesisht me zhvillimin e pritshëm të fenomenit të motit ‘La Niña’ në të ardhmen e afërt, si dhe me temperaturat shumë të larta të Oqeanit Atlantik, njofton NOAA.
Në përgjithësi, sipas NOAA, mund të zhvillohen diku nga 17 deri në 25 stuhi të emërtuara (me erëra mbi 40 milje në orë). Midis tyre, 8 deri në 13 stuhi mund të zhvillohen në uragane (mbi 119 km/h), nga të cilat katër deri në shtatë do të jenë të kategorisë 3 ose më lart (me 178 km/h).
“Këto parashikime janë një arsye për t’u shqetësuar, padyshim, por jo për panik”, tha Ken Graham, drejtor i Shërbimit Kombëtar të Motit të SHBA (NWS), duke u kërkuar amerikanëve të përgatiten për mundësinë e stuhive të forta.
Sezoni i uraganeve të Atlantikut të Veriut zgjat nga fillimi i qershorit deri në fund të nëntorit. Uraganët mund të jenë shkatërrues dhe kërcënues për jetën, veçanërisht në jug të Shteteve të Bashkuara.
Në vitin 2022, Uragani Ian goditi me ashpërsi të madhe Florida, duke shkaktuar dhjetëra vdekje dhe më shumë se 100 miliardë dollarë dëme materiale.
Në përgjithësi, me ngrohjen globale, uraganet po bëhen më të forta pasi ato nxiten nga oqeanet më të ngrohta sipërfaqësore, thonë shkencëtarët.
LEXO EDHE: Ndryshimet klimatike/ Çfarë rrezikon Shqipëria dhe çfarë duhet të bëjmë?
