Modelimi i ri ekonomik nga tregu kryesor i sigurimeve në botë, “Lloyd’s” i Londrës, ka treguar se ngjarjet ekstreme të motit që dëmtojnë furnizimin me ushqim dhe ujë mund t’i kushtojnë ekonomisë globale 5 trilionë dollarë për një periudhë pesëvjeçare.
Modelimi merr për bazë ngjarjet hipotetike ekstreme, por të besueshme, të motit, të tilla si thatësira e rëndë ose përmbytjet, dhe parashikon se si mund të zhvillohen skenarët në të gjithë ekonominë globale dhe se si dëmi dhe humbja e të korrave do të nxisin ndryshime të rëndësishme në gjeopolitikë dhe sjelljen e konsumatorëve.
Hulumtimi synon të ndihmojë bizneset, qeveritë dhe siguruesit të kuptojnë se sa të ekspozuar janë ndaj rreziqeve të ngjarjeve ekstreme të motit të lidhura me ndryshimet klimatike.
5 trilionë dollarë është një kosto mesatare në tre nivele të ashpërsisë për një ngjarje ekstreme, të cilat variojnë nga 3 trilionë për ashpërsinë më të ulët në 17.6 trilionë dollarë për fatkeqësinë më ekstreme të motit.
Brenda modelimit, ngjarjet e motit renditen sipas probabilitetit që ato të ndodhin, me një ngjarje të madhe që ka një shans një herë në 50 vjet për të ndodhur, një ngjarje e rëndë një shans një herë në 100 vjet dhe një ngjarje ekstreme me probabilitetin një herë në 300 vjet.
Modelimi kompleks ekonomik mund të zbatohet edhe në nivel rajonal. Për shembull, nëse një ngjarje ekstreme do të ndodhte në Kinë, ajo do të çonte në 4.6 trilionë dollarë humbje ekonomike gjatë pesë viteve. Nëse diçka si një stuhi ekstreme godet Karaibet, modelimi llogarit se vendet në rajon mund të humbasin kolektivisht 19% të prodhimit të tyre të brendshëm bruto gjatë një periudhe pesëvjeçare.
Hulumtimi i “Lloyd’s” thekson një hendek midis sigurimit dhe humbjeve të mundshme ekonomike, sepse vlerësohet se vetëm një e treta e humbjeve ekonomike globale që mund të shkaktohen nga moti ekstrem dhe rreziqet e lidhura me klimën janë aktualisht të siguruara.
LEXO EDHE: Ndryshimet klimatike/ Sigurimi nga katastrofat natyrore, varka e vetme e shpëtimit
