Mjegulla e dendur ka rezultuar fatale në Greqi. Sipas mediave vendase mësohet se mëngjesin e sotëm në autostradën kombëtare, konkretisht në lartësinë e Avlonës dhe rrugës për në Athinë , ka ndodhur një aksident automobilistik në të cilin janë përfshirë më shumë se dhjetë makina.
Në zonë, dukshmëria është e kufizuar për shkak të mjegullës, e cila vështirëson shikimin e drejtuesve të automjeteve, duke sjellë përplasjen.
Nga videot e publikuara shihet se në aksident janë përfshirë edhe kamionë, ndërsa disa nga makinat shihet se janë dëmtuar keq. Deri më tani nuk dihet nëse ka të plagosur, ndërkohë policia ndodhet në vendin e ngjarjes dhe po punon për zbardhjen e plotë të aksidentit.
Sipas një informacioni zyrtar nga Policia Rrugore, aksidenti rrugor ka ndodhur pak minuta pas orës 9 të mëngjesit. Më herët, në orën 08:30, një tjetër aksident automobilistik ka ndodhur në drejtim të Lamisë, ku janë përplasur gjashtë automjete.
