Françesko Hasa është mesfushori i ri me tipare sulmuese, 24-vjeçar, që këtë vit nisi debutimin historik të Vorës në Abissnet Superiore, me një lajm të keq: dëmtimin e tij.
Mesfushori mbeti i dëmtuar rëndë në ndeshjen hapëse kundër Partizanit, një lloj derbi mes fqinjëve të qarkut të Tiranës.
I riu e la ndeshjen mes dhembjesh duke dalë nga fusha me barrelë.
Ditën e sotme klubi i Vorës, për herë të parë në historinë e klubit në Superiore, njoftoi se mjeku Sasha Jankoviç kreu ndërhyrjen kirurgjikale me sukses.
Kjo ndërhyrje u mundësua falë mbulimit ekskluziv me siguracion për sporistët që SIGAL Insurance GROUP ka dakordësuar me Federatën Shqiptare të Futbollit.
Ish-mesfushori i grupmoshave të Tiranës, i Turbinës së Cërrikut, Kukësit dhe së fundmi i Vorës, do t’i nënshtrohet edhe fazës rikuperuese për të qenë sa më parë në fushën e blertë.
