Tregu gjigant i sigurimit për makinat elektrike në Kinë po përballet me vështirësi të mëdha.
Kompanitë e sigurimeve po raportojnë humbje të mëdha, pasi modelet e tyre të vlerësimit të rrezikut nuk kanë mbajtur ritmin me ndryshimet në ekonominë e automjeteve dhe sjelljen e drejtuesve.
Vetëm në vitin 2024, industria humbi mbi 5.7 miliardë juanë nga sigurimi i makinave elektrike, pavarësisht se pronarët paguajnë prime deri dyfish më të larta se ato për makinat me benzinë.
Një nga arsyet kryesore janë kostot e larta të riparimeve.
Bateritë, që zënë deri në një të tretën e vlerës së makinës, janë të shtrenjta dhe shpesh kërkojnë pjesë të specializuara.
Për më tepër, pronarët e rinj të makinave elektrike, shpesh më të rinj në moshë, rezultojnë dy herë më të prirur për të bërë kërkesa dëmshpërblimi.
Shumë prej tyre përdorin automjetet për shërbime transporti me pagesë, duke shtuar më tej rrezikun e aksidenteve.
Për shkak të këtyre faktorëve, disa kompani kanë rritur ndjeshëm çmimet ose janë tërhequr nga sigurimi i makinave elektrike, duke e bërë gjithnjë e më të vështirë për drejtuesit të gjejnë mbulim të përballueshëm.
Disa shoferë, si rasti i një pronareje të Tesla-s në Hangzhou, raportojnë se primet e tyre janë rritur katërfish brenda pak vitesh, duke i detyruar të ndryshojnë makinë ose sigurues.
Autoritetet kineze po përpiqen të zbusin krizën përmes platformave të reja që lidhin drejtuesit me kompanitë e sigurimeve dhe me udhëzime për uljen e kostove të pjesëve të këmbimit.
Megjithatë, ekspertët paralajmërojnë se sigurimi i makinave elektrike është ende në fazën e “provës dhe gabimit” dhe se fitimi i kompanive nuk do të jetë i garantuar për të paktën tre vite të tjera, ndërsa shitjet e makinave elektrike vazhdojnë të tejkalojnë ato me benzinë.
