Pronësia intelektuale e këtij artikulli i takon autores Amanda Cassar.
Komenti është publikuar sot në Insurance News Net Magazine me titullin: “Reframing life insurance to connect with Gen Z”.
Sigurime.Online vetëm sa e shqipëron ekskluzivisht komentin në fjalë për lexuesin shqiptar:
Gati gjysma e brezit Z ndodhet sot në një moment kyç të jetës: ata janë bërë pjesë e tregut të punës, po menaxhojnë shpenzime të reja dhe po përpiqen të balancojnë dëshirën për të shijuar jetën me nevojën për të planifikuar të ardhmen.
Teksa nisin të ndërtojnë bazat financiare, sigurimi i jetës mund t’u duket si diçka e largët ose e panevojshme. Shumë të rinj e shtyjnë këtë vendim për shkak të të ardhurave të kufizuara dhe për shkak të mendësisë së zakonshme: “kjo e keqe nuk do më ndodhë mua.”
Këshilltarët financiarë kanë mundësi ta ndryshojnë këtë mënyrë të të menduarit.
Duke kuptuar se si mendon brezi Z, si në aspektin financiar ashtu edhe në atë personal, këshilltarët mund të nxisin biseda për sigurimin e jetës që lidhen vërtet me realitetin dhe vlerat e këtij brezi.
Nëse shërbimet përshtaten me mënyrën dixhitale të jetesës së tyre, me vlerat që ndjekin dhe me mënyrën si mësojnë, mund të jemi më pranë tyre dhe t’i ndihmojmë të mbrojnë të ardhmen e tyre.
Të flasësh në gjuhën e brezit Z
Çdo brez ka përpara sfida për të mësuar kur hyn në të 20-at, por brezi Z dallohet për një qasje më të kujdesshme financiare krahasuar me milenialët.
Ky brez ka gjetur një ekuilibër mes marrjes së rreziqeve dhe kursimit, dhe për këtë arsye është më i hapur ndaj bisedave për sigurinë financiare.
Duke e kuptuar këtë mënyrë të të menduarit, këshilltarët mund ta paraqesin sigurimin e jetës si pjesë të një strategjie të ekuilibruar financiare — që ofron siguri për të ardhmen pa i hequr të tashmes të drejtën për t’u jetuar.
Tregimi i historive është një tjetër mënyrë e fuqishme për të shpjeguar sigurimin e jetës si mbrojtje nga rreziku.
Shembuj të vërtetë të të rinjve, familjet e të cilëve ishin të mbrojtura ose jo pas një humbjeje të papritur, e bëjnë më të prekshme rëndësinë e sigurimit.
Kur krijohet ky bazament emocional, klientët janë më të gatshëm të kuptojnë rreziqet që vijnë nga vonesa — si çmime më të larta në të ardhmen apo humbja e përfitimeve që vijnë nga fillimi i hershëm.
Por brezi Z nuk do të angazhohet nëse ndien që po i “shitet” diçka.
Biseda duhet të jetë e vërtetë dhe e ndershme. Sigurimi i jetës duhet paraqitur si kujdes për veten. Mund ta quani edhe “kontratë dashurie” — një mënyrë për të mbrojtur trashëgiminë dhe njerëzit që i duan.
Duhet shmangur gjuha teknike dhe në vend të saj duhet ofruar edukim i qartë. Kur idetë e ndërlikuara ndahen në pjesë të thjeshta, ndryshon edhe mënyra si shihet sigurimi i jetës.
Të takosh brezin Z aty ku ndodhet: në botën digjitale
Për ta tërhequr brezin Z, këshilltarët duhet t’u afrohen aty ku ata ndodhen më shumë: në internet.
Kur kërkojnë informacion financiar, ky brez shkon më parë në rrjetet sociale sesa tek një këshilltar. Kjo sjell rrezik, sepse shpesh hasin informacione të gabuara, pasi shumë “fin-fluencues” nuk janë profesionistë të licencuar.
Këshilltarët duhet të jenë aktivë në këto platforma. Nuk mjafton të presin që të rinjtë të vijnë vetë.
Duhet t’i takojnë aty ku janë. Edhe online mund të përdoren të njëjtat teknika si rrëfimi dhe riformulimi për të tërhequr dhe lidhur brezin e ri me sigurimin.
Është shumë e rëndësishme të kuptojmë se vlerat ndikojnë fort në vendimet financiare të brezit Z.
Ata janë të vetëdijshëm për çështje sociale dhe duan të bashkëpunojnë me kompani që përputhen me bindjet e tyre.
Kur është e mundur, lidhi me kompani sigurimi që mbështesin çështje mjedisore, sociale dhe të qeverisjes së mirë. Brezi Z nuk zgjedh vetëm një produkt të mirë, por kërkon edhe një partner të mirë.
Ndaj është koha për të vepruar
Teksa po ndodh “transferimi i madh i pasurisë” nga brezat më të vjetër tek më të rinjtë, paraqitet një mundësi e jashtëzakonshme për t’i udhëhequr me këshilla të qëndrueshme financiare.
Por kjo ndodh vetëm nëse krijohet një marrëdhënie që i jep forcë brezit Z të marrë kontrollin e të ardhmes dhe trashëgimisë së vet me besim dhe siguri.
