Një raport i fundit nga Këshilli i Evropës, i titulluar Forward Look 2025 – Time for Leadership, paralajmëron se ndikimi i ndryshimeve klimatike po e vë industrinë e sigurimeve në Evropë përballë një krize të mundshme. Rritja e kostove për fatkeqësitë natyrore dhe zgjerimi i boshllëqeve në mbulimin e sigurimeve përbëjnë kërcënime të drejtpërdrejta për ekonomitë dhe qytetarët evropianë.
5 ishin pikat kyçe për vëmendje sipas këtij raporti:
1. Kosto në rritje për fatkeqësitë natyrore
Ngjarjet ekstreme klimatike i kanë kushtuar BE-së 738 miliardë euro në katër dekadat e fundit, me 162 miliardë euro humbje vetëm në periudhën 2021–2023. Siguruesit hasin gjithnjë e më shumë vështirësi për të përballuar këto humbje të shpeshta dhe të mëdha.
2. Rreziku i pasigurueshmërisë së aseteve
Në disa rajone të Evropës, ekziston tashmë mundësia reale që asetet të bëhen të pasigurueshme, duke lënë boshllëqe të mëdha në mbulim dhe duke ekspozuar qeveritë dhe individët ndaj pasojave të drejtpërdrejta financiare.
3.Ngjarje kritike të zhvillimeve klimatike
Fenomene si shkrirja e akujve në Grenlandë dhe ekstremet e motit në Evropë dëshmojnë për rritjen e rreziqeve sistemike. Raporti thekson urgjencën për strategji të mirëfillta përshtatjeje ndaj klimës, krahas përpjekjeve për të zbutur efektet.
4. Bashkëpunimi ndërkombëtar, një domosdoshmëri
BE-ja kontribuon vetëm 6.7% të emetimeve globale, çka nënvizon nevojën për veprim kolektiv ndërkombëtar. Luhatjet në angazhimet e vendeve të mëdha si SHBA sfidojnë lidershipin klimatik të Evropës dhe krijojnë pasiguri për të ardhmen.
5. Përshtatja përballë krizës
Raporti bën thirrje që industria e sigurimeve të mos veprojë vetëm në mënyrë reaktive ndaj krizave, por të ndërtojë elasticitet proaktiv. Iniciativa si COP30 duhet të nxisin plane kombëtare të përshtatjes dhe reformë sistemike për të mbrojtur ekonomitë dhe komunitetet evropiane.
