Sigurimi luan një rol kyç në zbutjen e ngrohjes së mëtejshme globale dhe arritjen e qëllimeve të Marrëveshjes së Parisit. Sektori menaxhon rreth 11 trilionë euro vetëm në Evropë.
Dhe transformimi “green” i ekonomisë evropiane mund të ketë sukses vetëm nëse këto para investohen në kompani që operojnë në mënyrë të qëndrueshme.
“Ne jemi të vetëdijshëm për përgjegjësinë tonë dhe i kemi vendosur vetes objektiva ambicioze: emetimet neto zero deri në vitin 2040 në Austri dhe deri në vitin 2050 në të gjitha vendet e Grupit UNIQA. Prandaj, portofoli ynë i investimeve është në përputhje të vazhdueshme me objektivin e Marrëveshjes së Parisit 1.5°C”, shpjegoi René Knapp, Anëtar i Bordit Drejtues dhe Drejtues për Markën dhe Qëndrueshmërinë në UNIQA Insurance Group AG.
UNIQA bëhet kështu e vetmja kompani austriake e sigurimeve, objektivat e përkohshëm të së cilës janë vërtetuar me sukses. Aktualisht nuk ka asnjë kompani tjetër në të gjithë sektorin financiar austriak, objektivat e përkohshëm 1.5°C të së cilës janë njohur nga SBTi. Këto objektiva të bazuara në shkencë bazohen në një parim të thjeshtë: fokusimi në sasinë e emetimeve që duhet të reduktohen për të arritur qëllimin kryesor të Marrëveshjes së Parisit për të kufizuar ngrohjen globale në 1.5°C.
“Ne po veprojmë në përputhje me gjetjet dhe parimet shkencore për të reduktuar emetimet tona të gazeve serrë. Ne jemi krenarë që objektivat e reduktimit të bazuar në shkencë të UNIQA janë verifikuar dhe konfirmuar nga SBTi”, thotë Knapp, i cili shton se, kjo sjellje forcon besueshmërinë e publikut te grupi.
“Sektori financiar është kyç për reduktimin e emetimeve. Ne e përgëzojmë UNIQA Insurance Group për vendosjen e objektivave të bazuara në shkencë që mbulojnë jo vetëm emetimet e tyre operacionale, por edhe portofolin e tyre të investimeve”, tha Luiz Amaral, Drejtor Ekzekutiv i nismës së Objektivave të Bazuar në Shkencë.
“Objektivat e UNIQA Insurance Group vijnë në një moment kyç për sektorin dhe demonstrojnë veprimet urgjente të nevojshme për të parandaluar efektet më të dëmshme të ndryshimeve klimatike”.
LEXO EDHE: “Lëvizim Green”/ SIGAL UNIQA me flotë makinash elektrike: Bashkë për një Shqipëri më të gjelbër
Më poshtë gjeni detaje mbi objektivat e përkohshme të UNIQA:
- Dalja nga përdorimi i qymyrit, naftës dhe gazit natyror
UNIQA ka një udhërrëfyes të qartë për largimin nga lëndët djegëse fosile si qymyri, nafta dhe gazi natyror. Kompania tashmë nuk po bën më asnjë investim të ri në qymyr ose naftë, dhe nga viti 2024 asnjë biznes i ri nuk mund të merret në sigurim nëse përdor këto produkte.
- Energjia e gjelbër në UNIQA
UNIQA po ndërmerr veprimet e duhura në fushën e ekologjisë së biznesit. Vënia në punë e sistemit të ri fotovoltaik në çatinë e selisë së UNIQA në verën e vitit 2023, më i madhi ndonjëherë në një ndërtesë të një kompanie, është një moment historik i madh: falë fuqisë së tij prej 125 kWp, ai do të jetë në gjendje të prodhojë 100,000 kWh energji elektrike për vit në të ardhmen. Kjo korrespondon me konsumin vjetor të rreth 30 familjeve dhe do të shmangë emetimet e rreth 21 tonë CO2 në total.
UNIQA ka rritur prodhimin e saj fotovoltaik të instaluar nga 50 kWp në mbi 400 kWp që nga viti 2020, një rritje 8-fish në vetëm pak vite. Deri në vitin 2035, prodhimi fotovoltaik duhet të jetë së paku 600 kWp.
UNIQA gjithashtu ka blerë 100% energji elektrike të gjelbër prej vitesh në Austri. Nga viti 2024 e në vazhdim do të blihet vetëm energji elektrike “green” e certifikuar me Ecolabel Austriak 46 (UZ 46 “Green Electricity”).
UNIQA Insurance Group, kompani e themeluar në vitin e largët 1811 dhe pjesë e tregut të sigurimeve në 17 shtete të ndryshme të Evropës, prej marsit 2007 është pjesë edhe e tregut rajonal, në Shqipëri, Kosovë dhe Maqedoninë e Veriut përmes Grupit “SIGAL UNIQA”.
“UNIQA” numëron mbi 16 milionë klientë ndërsa është vlerësuar nga “Standard & Poor’s” me “A”.
