Përkthyer në shqip nga artikulli i Alex Longley në InsuranceJournal, 19 qershor 2025
Kostoja e sigurimit për anijet që lundrojnë në Gjirin Persik është rritur ndjeshëm, pas përshkallëzimit të sulmeve midis Iranit dhe Izraelit që kanë shtuar rrezikun për mjetet detare në këtë zonë.
Sipas Marcus Baker, kreu global i sigurimeve detare në Marsh McLennan – ndërmjetësi më i madh i sigurimeve në botë – primet për sigurimin e anijeve që hyjnë në Gjirin Persik janë rritur nga 0.125% në 0.2% të vlerës së anijes.
Ai shtoi se rritja është vërejtur edhe për anijet që kalojnë në Detin e Kuq.
“Ka pasur lëvizje të dukshme në normat e sigurimit për rrezik lufte për anijet që lundrojnë në Detin e Kuq, Gjirin Arabik dhe portet izraelite,” tha Baker.
Megjithëse rritja për Gjirin Persik është e madhe në përqindje, në raport me koston e përgjithshme të ngarkesave dhe prenotimit të anijes, mbetet e përballueshme.
Për një supertanker të madh, kjo nënkupton një shtesë rreth 75,000 dollarë krahasuar me koston e ngarkesës prej 153 milionë dollarësh.
Sidoqoftë, normat për sigurimin ndaj rrezikut të luftës ndryshojnë sipas tolerancës së rrezikut të çdo siguruesi.
Disa pronarë anijesh mund të mos ndiejnë ndikim të madh për shkak të përfitimeve nga mungesa e dëmeve të mëparshme (bonuse pa pretendime), dhe shpesh i kanë shpëtuar rritjeve të mëdha të primeve.
Baker shtoi gjithashtu se kohëzgjatja e vlefshmërisë së ofertave të sigurimit është reduktuar nga 48 në 24 orë, për të reflektuar paqëndrueshmërinë e tregut.
Ai theksoi se është vërejtur një rritje e mprehtë në tarifat për anijet që ndalojnë në Izrael, ku kostoja e sigurimit është më shumë se trefishuar – nga 0.2% në 0.7% të vlerës së anijes.
