Hong Kong shënoi sot një rekord reshjesh për muajin gusht, pasi stuhitë e dhunshme sollën përmbytje, vonesa të mëdha në udhëtime dhe kaos në qytet.
Sipas Observatorit të Hong Kongut, deri në orën 14:00 u regjistruan 356 milimetra shi — niveli më i lartë ditor i muajit.
Paralajmërimi i zi për shi, i lëshuar në orët e para të mëngjesit, mbeti në fuqi për gati 12 orë, duke ndërprerë jetën e përditshme dhe duke mbyllur edhe disa dalje të metrosë e seanca gjyqësore.
Situata preku ndjeshëm aeroportin ndërkombëtar, ku të paktën 431 fluturime pasagjerësh dhe mallrash u vonuan dhe 12 u anuluan.
Përmbytjet shkaktuan gjithashtu 14 rrëshqitje dheu, përfshirë një në Po Shan Road, zonë që njihet për tragjedinë e vitit 1972 me 67 viktima.
Ekspertët paralajmërojnë se shirat e përsëritur në intervale të shkurtra e mbingarkojnë tokën dhe rrisin rrezikun e fatkeqësive të tjera natyrore.
Kjo valë reshjesh të rralla pason një gjysmë të parë të vitit shumë të thatë, me më pak se gjysmën e reshjeve normale.
Ngjarje të ngjashme po përjetohen edhe në rajon, Shenzheni shpalli një alarm të kuq për herë të parë që nga viti 2018 dhe Pekini e Shangai patën përmbytje vdekjeprurëse.
Ngjarje të tilla theksojnë rritjen e rreziqeve klimatike në Azi dhe rëndësinë e sigurimeve për të mbuluar dëme të paparashikueshme.
Kujtohet se reshja e zezë historike e shtatorit 2023 shkaktoi kërkesa sigurimi rreth 1.5 miliardë dollarë hongkongas.
Ekspertët e industrisë paralajmërojnë se edhe stuhitë e kësaj jave mund të përkthehen në kërkesa të reja të mëdha, duke vënë në provë kapacitetin e siguruesve për të përballuar rritjen e frekuencës së fatkeqësive natyrore.
Për konsumatorët dhe bizneset, sigurimi shihet gjithnjë e më shumë si mjeti i vetëm për të rikthyer stabilitetin financiar pas goditjeve klimatike.
