Po zhvillohet në Tiranë Kampionati Evropian “FIBA U16 Eurobasket – Divizioni C” me kombëtaren shqiptare që vijon të shkëlqejë.
Pas fitores kundër Azerbajxhanit, me rezultatin 60-56, Shqipëria triumfoi edhe në sfidën e dytë kundër Maltës, takim i vlefshëm për Grupin A, i zhvilluar në sallën “Feti Borova”.
Adoleshentët e koshit kuqezi, të drejtuar nga trajneri Artur Kasaj, dominuan tërësisht përballë bashkëmoshatarëve të tyre nga Malta, duke fituar me rezultatin e thellë 88-49 e duke marrë kështu vendin e parë në grup.
Sot Shqipëria U-16 luan ndeshjen e fundit në grup përballë Moldavisë por me dy fitoret e arritura e ka arritur tashë gjysmëfinalen.
Gjysmëfinalet do të luhen ditën e shtunë, ndërsa të dielën luhet finalja e madhe.
Kujtojmë se përveç Shqipërisë, në këtë kompeticion marrin pjesë edhe Kosova, Azerbajxhani, Moldavia, Malta, Gjibraltari, San Marino dhe Armenia.
Federata ndërkombëtare e Basketbollit (FIBA) i ka besuar Shqipërisë organizimin e Kampionatit Evropian U16 dhe U18 për djem.
Pas përfundimit të ndeshjen në “Feti Borova” më 14 korrik, vëmendja do të zhvendoset më tej në Elbasan, ku në datat 23-28 korrik, do të luhet europiani U18.
Prezent në Elbasan do të jetë edhe Drejtori Ekzekutiv i FIBA EUROPE, Kamil Novak.
Pak ditë më parë, ishte Kombëtarja e Femrave e cila fitoi medaljen e bronzit në “European Championship for small countries”.
LEXO EDHE: Nis bashkëpunimi teknik mes FSHB dhe Federatës Italiane të Basketbollit
