Treguesi i ndjesisë ekonomike (TNE) shënoi një rënie të lehtë prej 0.8 pikësh në muajin gusht. Megjithatë, niveli i tij vijon të qëndrojë rreth 8 pikë përqindje mbi mesataren historike, sipas të dhënave të Bankës së Shqipërisë.
Dobësimi i TNE-së u ndikua kryesisht nga rënia e besimit në sektorët e industrisë, ndërtimit dhe shërbimeve, ndërsa ulja e besimit të konsumatorit dha një ndikim më të vogël. Në kahun pozitiv, tregtia shënoi një rritje të fortë të besimit.
Në industri, treguesi ra me rreth 4 pikë përqindje, i ndikuar nga pritjet më të dobëta për prodhimin dhe porositë nga eksportet, si dhe nga ulja e planeve për punësim. Ndërtimi gjithashtu regjistroi një rënie prej 2 pikësh, për shkak të vlerësimeve më të ulëta për aktivitetin dhe kontratat, ndonëse pritjet për çmime dhe punësim mbetën pozitive.
Në shërbime, treguesi i besimit u tkurr me 2.1 pikë përqindje, si pasojë e vlerësimeve më të dobëta për aktivitetin aktual dhe kërkesën, si dhe pritjeve më të ulëta për punësimin. Megjithatë, ky tregues vijon të qëndrojë shumë mbi mesataren historike.
Kundër rrymës, tregtia u rrit me 5.4 pikë përqindje, duke u mbështetur te ecuria aktuale e biznesit dhe pritjet më të forta për punësim. Edhe treguesi i konsumatorit pësoi një rënie të lehtë prej 0.5 pikësh, pasi qytetarët u shprehën më pak optimistë për ekonominë dhe financat e tyre.
Në përgjithësi, të dhënat tregojnë një ngadalësim të besimit ekonomik në sektorët prodhues dhe shërbimor, ndërsa tregtia mbetet pika e fortë e gushtit.
Çfarë është TNE?
The Economic Sentiment Indicator (ESI) është një tregues i përbërë që mat besimin ekonomik në një vend apo rajon. Ai kombinohet nga vrojtimet e besimit në disa sektorë kryesorë: industria, ndërtimi, shërbimet, tregtia, konsumatorët
Vlerat e tij jepen zakonisht në raport me një mesatare historike (100). Nëse treguesi është mbi 100, tregon besim më të lartë se mesatarja historike. Nëse është nën 100, tregon besim më të ulët se mesatarja. Pra, ESI përdoret nga banka qendrore, institucionet financiare dhe analistët për të kuptuar pritjet e bizneseve dhe konsumatorëve për ekonominë, duke ndihmuar në parashikimin e rritjes ose ngadalësimit ekonomik.
