Indeksi S&P 500 i kompanive më të mëdha amerikane ka rënë me mbi 9%.
Shumëkombëshja Nasdaq, e fokusuar në teknologji, ka rënë me gati 15%.
“Shtatë Madhështoret” (Alphabet, Apple, Nvidia)—kanë humbur një të katërtën e vlerës së tyre.
Investitorët, siç e kemi raportuar më herët në Sigurime.Online, janë drejtuar drejt strehimeve të sigurta si ari.
Një pjesë e tyre është përpjekur të diversifikojë duke blerë aksione të listuara në tregje të tjera.
The Economist, sot, me të drejtë ngrinte pyetjen: kush po fiton nga tarifat?
Po t’u referohemi fondeve të tregtuara në bursë (ETFs), pothuajse 1 miliard dollarë u tërhoqën nga aksionet amerikane dhe u investuan 9 miliardë dollarë në ato evropiane.
The Economist vërente se tregjet me performancën më të mirë ndajnë dy karakteristika të përbashkëta.
E para, kanë ekspozim të ulët ndaj tarifave amerikane.
E dyta, kanë një rritje të fortë të ekonomisë së brendshme.
Gazeta sjell një renditje nga Oxford Economics, një firmë konsulence, e cila vlerësonte performancën e tregjeve të aksioneve të vendeve të ndryshme.
Firma krahason ndjeshmërinë e këtyre vendeve ndaj tarifave.
Elementë të përfshirë në matje ishin: varësia ndaj të ardhurave amerikane, madhësia e sektorëve të prodhimit dhe ndjeshmëria ndaj cikleve industriale globale.
Sipas këtij treguesi, indeksi me performancën më të mirë në Evropë është ai i Spanjës.
Indeksi IBEX 35 është rritur me gati 13% që nga inaugurimi i zotit Trump.
Ekonomia spanjolle po rritet me ritme të shpejta, e nxitur nga turizmi dhe një rritje e madhe e migracionit.
Spanja është më pak e ndjeshme ndaj tarifave në krahasim me vende të tjera evropiane, si Italia apo Gjermania.
Bursa spanjolle mbështetet kryesisht në sektorin e shërbimeve publike dhe të energjisë—industri që zakonisht u qëndrojnë mirë krizave ekonomike.
Spanja nuk është e vetmja.
Edhe tregje të tjera më të vogla po performojnë më mirë.
Indeksi kryesor i Polonisë është rritur me 21%.
Rritja e shpejtë ekonomike dhe ekspozimi i kufizuar ndaj tarifave amerikane kanë luajtur një rol parësor.
Meksika është shumë e ekspozuar ndaj luftërave tregtare të zotit Trump, por bursa e saj ka performuar më mirë se sa pritej.
Rasti i Meksikës përbën surprizë.
Përjashtimi i Meksikës nga tarifat e reja “reciproke” është njeri faktor ndikues.
Tjetri është dominimi i ekonomisë nga tregtarët me pakicë dhe bankat, që janë kryesisht të mbrojtura nga tronditjet e tregtisë globale.
Gjermania është gjithashtu një përjashtim.
Sipas Oxford Economics, Gjermania është vendi i dytë më i ndjeshëm ndaj tarifave të zotit Trump, pas Tajvanit.
Megjithatë, indeksi kryesor i saj, DAX, është rritur me 6% që nga inaugurimi.
Edhe indeksi Hang Seng i Hong Kongut ka shënuar rritje, pavarësisht tensioneve midis zotit Trump dhe Kinës kontinentale.
Mirëpo gazeta The Economist ngre një pyetje tjetër: “A është ky momenti i duhur për të investuar në këto tregje?”
Kthimet afatgjata në Evropë kanë qenë më të ulëta se ato në Amerikë.
Rritja më e ngadaltë ekonomike, fragmentimi politik dhe sektori teknologjik më i vogël ndikojnë në sa më sipër.
Megjithatë, ky nuk duket faktor pengues për zhvendosje, duke patur parasysh se momentalisht investitorët po kërkojnë qëndrueshmëri dhe jo fitime të larta e të kënaqshme.
