Fëmijët, të moshuarit dhe personat me sëmundje kronike janë më të rrezikuarit nga vapa përvëluese që ka përfshirë vendin tonë ditët e fundit.
Duke marrë shkas nga kjo situatë me temperatura të larta, Instituti i Shëndetit Publik jep disa rekomandime mbi kujdesin që duhet treguar.
“Të gjithë njerëzit janë të rrezikuar nga temperaturat e larta, por veçanërisht të rrezikuar janë ato grupe që ne i quajmë grupe vulnerabël, apo grupet e cenueshme siç janë të moshuarit, fëmijët apo pacientët që kanë sëmundje kronike.
Rekomandohet të përdoret sa më shumë uji, pasi pengon dehidratimin, paralelisht rekomandojmë shmangien e përdorimit të kafesë dhe të pijeve alkoolike.
Një këshillë tjetër që jepet është shmangia e qëndrimit në mjediset e jashtme në momentet kur temperaturat janë shumë të larta.
Për vende si Shqipëria rekomandohet shmangia e qëndrimit në këto mjedise nga ora 11:00 deri në orën 18:00 pasdite”.
Ndër të tjera, për të përballuar këtë valë të të nxehtit afrikan duhet konsum i ushqimeve sa më të shëndetshme dhe të freskëta.
“Një rekomandim shumë i mirë është ushqyerja e shëndetshme, veçanërisht gjatë ditëve të nxehta të verës rekomandohet marrja e ushqimeve të lehta, të lëngshme dhe sa më shumë fruta e perime. Një rekomandim tjetër për të sëmurët kronikë, të vazhdojnë mjekimin me ilaçe në mënyrë të rregullt siç bëjnë gjatë ditëve të dimrit sepse temperaturat e nxehta ndikojnë pikërisht në ecurinë e këtyre sëmundjeve kronike”.
Instituti i Shëndetit Publik ndër të tjera nënvizon se nëse konstatoni probleme shëndetësore duhet të kontaktoni mjekun e familjes ose urgjencën kombëtare.
LEXO EDHE: Shuarësit më të mirë të etjes në verë
Sipas Shërbimit Meteorologjik Ushtarak, vala e të nxehtit afrikan do të zgjasë deri në mesin e javës tjetër me temperatura 43 apo 44 gradë Celcius.
“Masat ajrore me origjinë nga veriu i Afrikës kanë përfshirë pjesën më të madhe të Ballkanit duke sjellë temperatura të larta që janë disa gradë mbi mesataren mujore. Këto masa ajrore tashmë e kanë përfshirë edhe vendin tonë duke sjellë temperature të larta.
Këto masa ajrore do të jenë prezente në vendin tonë deri në mesin e javës tjetër duke na sjellë rritje të temperaturave më kulmin e vet që pritet ta arrijnë ditën e hënë dhe të martën ku në zonat e ulëta termometri të shënojë 43, 44 gradë Celcius”, u shpreh Besa Sherollari, nga Shërbmi Meteorologjik Ushtarak.
