Aksidenti tragjik i regjistruar në Durrës, ku një këmbësor humbi jetën, është nën hetim nga organet kompetente, të cilat do të përcaktojnë shkaqet e ngjarjes dhe përgjegjësinë ligjore.
Sigurime.online nuk përcakton fajësi dhe nuk paragjykon rezultatin e hetimeve.
Vlerësimi i përgjegjësisë është kompetencë ekskluzive e Policisë, Prokurorisë dhe gjykatave, sipas rastit.
Sipas legjislacionit në fuqi, çdo person që pëson dëm nga përdorimi i një mjeti transporti brenda territorit të Republikës së Shqipërisë ka të drejtë të kërkojë dëmshpërblim për humbjet ose dëmet e pësuara. Ky dëmshpërblim mund të përfshijë dëmet ndaj personit, si dëmin pasuror në rast vdekjeje, dëmtimesh të përkohshme ose të përhershme, si edhe dëmin jopasuror, ku përfshihen dëmi biologjik, dëmi moral dhe dëmi ekzistencial. Gjithashtu, e drejta e dëmshpërblimit shtrihet edhe mbi dëmet ndaj pronës, në përputhje me kriteret dhe procedurat e përcaktuara nga legjislacioni në fuqi.
Megjithatë, me qëllim informimin e qytetarëve, sqarojmë se nëse nga hetimet rezulton se drejtuesi i mjetit mban përgjegjësi për aksidentin, atëherë aktivizohet e drejta ligjore e trashëgimtarëve të viktimës për të kërkuar dëmshpërblim nga sigurimi i detyrueshëm motorik (TPL), sipas parashikimeve të Ligjit nr. 32/2021 dhe rregullores përkatëse.
Neni 15 i Rregullores së AMF
Përllogaritja e dëmit ndaj personit me pasojë vdekje
1. Bazuar në pikën 3, germa b), të nenit 25, të Ligjit 32/2021, në rastet e dëmeve me pasojë vdekje, dëmi pasuror do të llogaritet si në rastin e paaftësisë së plotë të përhershme me ndryshimin që nga të ardhurat sipas nenit 14 të kësaj rregulloreje, të zbriten të ardhurat për nevojat e vetë personit, të cilat varen nga numri i personave në familje. Përllogaritja e dëmit ndaj personit me pasojë vdekje bëhet sipas kësaj formule:
𝐃 = (𝐓𝐚𝐩 − 𝐊𝐚𝐯𝐧𝐩 ∙ 𝐓𝐚𝐩)𝐊𝐒𝐡𝐤 ∙ 𝐊𝐦𝐝𝐩
ku:
𝐃 Dëmshpërblimi
𝐓𝐚𝐩– Të ardhurat personale vjetore
𝐊𝐚𝐯𝐧𝐩 – Koeficienti i të ardhurave për vetë nevojat e personit
𝐊𝐒𝐡𝐤 – Koeficienti i shumës së kapitalizuar
𝐊𝐦𝐝𝐩 – Koeficienti i moshës së daljes në pension
2. Të ardhurat personale, koeficienti i shumës së kapitalizuar dhe koeficienti i moshës së daljes në pension janë të njëjta me përcaktimet e dhëna në nenin 14, të kësaj rregulloreje.
3. Përqindja e të ardhurave për nevojat e vetë personit ( 𝑲𝒂𝒗𝒏𝒑 ) do të jetë si më poshtë:
a) Kur i ndjeri ka patur në familje tre ose më shumë se tre persona (pa të ndjerin) pjesa që do të zbritet është 30% e të ardhurave;
b) Kur i ndjeri ka patur në familje dy persona (pa të ndjerin) pjesa që do të zbritet është 40% e të ardhurave;
c) Kur i ndjeri ka patur në familje një person (pa të ndjerin) pjesa që do të zbritet është 50% e të ardhurave.
4. Kur i ndjeri është nën moshën 16 vjeç, trashëgimtarët e tij do të dëmshpërblehen në shumën fikse prej 2,500,000 lekë.
5. Në se trashëgimtarët e të ndjerit janë të mitur, dëmshpërblimi do të depozitohet në emër të tyre në një bankë të nivelit të dytë, e cila operon në Republikën e Shqipërisë.
6. Në vlerën e dëmshpërblimit me pasojë vdekje do të shtohen edhe shpenzimet e varrimit në shumën fikse prej 300,000 lekë.
7. Në se i ndjeri ka qenë i vetëm në familje do të paguhen vetëm shpenzimet e varrimit. Këto shpenzime i paguhen subjektit që ka kryer shërbimet funerale ose shtetit
Në rastet e humbjes së jetës, legjislacioni shqiptar parashikon kompensimin e dëmit pasuror dhe, sipas kushteve të ligjit, edhe të dëmeve jopasurore, ndërsa për procedurën e dëmshpërblimit kërkohet dokumentacioni i përcaktuar në rregullore, si certifikata e vdekjes, akti i trashëgimisë dhe dokumente të tjera përkatëse.
Gjithashtu, rregullorja parashikon mbulimin e shpenzimeve të varrimit në masën fikse të përcaktuar nga legjislacioni në fuqi.
Ky informacion ka vetëm karakter informues dhe ilustrues, me synimin për të rritur ndërgjegjësimin e qytetarëve mbi të drejtat që burojnë nga sigurimi i detyrueshëm motorik. Çdo e drejtë për dëmshpërblim lind dhe ushtrohet vetëm pasi përgjegjësia të jetë përcaktuar sipas procedurave ligjore nga organet kompetente.
