Konferenca RVS (Rendez-Vous de Septembre) në Monte Carlo vijon sot me një program të fokusuar te zhvillimet e reja në industrinë globale të sigurimeve dhe risigurimeve.
Në qendër të diskutimeve janë evoluimi i tregut të “legacy”, përdorimi i inteligjencës artificiale, risqet emergjente, si dhe ndikimi i fragmentimit gjeopolitik në kërkesën për produkte të reja sigurimi.
Programi i ditës zhvillohet kryesisht në Fairmont Monte-Carlo, Salon Lacoste, ndërsa aktiviteti mbyllet me koktejin zyrtar në mbrëmje.
Dita nisi me panelin “New Horizons for Legacy – Retrospective and beyond”, organizuar nga Insurance & Reinsurance Legacy Association (IRLA). Diskutimi u fokusua te e ardhmja e industrisë “legacy”, zgjidhjet gjithnjë e më të sofistikuara të kapitalit dhe afrimi i këtij segmenti me tregun tradicional të sigurimeve. Paneli u drejtua nga Kevin Gill, kryetar i IRLA dhe partner në EY Parthenon, me pjesëmarrjen e drejtuesve nga Swiss Re, Riverstone, Guy Carpenter, Enstar dhe DARAG.
Mandej diskutimi u zhvendos te inteligjenca artificiale me sesionin “Reasoning Across the Carrier: One System for Underwriting, Claims, and Capital”. Growth Protocol prezantoi një sistem të bazuar në AI neuro-simbolike, i cili synon të përdorë të njëjtën logjikë analitike në sigurim, trajtimin e dëmeve, aktuaristikë dhe financë. Diskutimi u fokusua te përdorimi i AI-së për analizimin e avokatëve dhe proceseve gjyqësore, në vlerësimin e ekspozimit ndaj dëmeve dhe parashikimin e zhvillimit të rezervave.
Programi vijoi me “Rewriting the emerging risk playbook: Inside Moody’s new Insurance Risk Radar”. Moody’s prezantoi perspektivat e saj mbi peizazhin e risqeve emergjente, ndërsa drejtues nga Moody’s, Swiss Re, Fairfax dhe Aon diskutojnë ekspozimet që po ndryshojnë industrinë e sigurimeve. Ndër temat kryesore ishin risqet e përgjegjësisë, “social inflation”, risqet globale të ndërlidhura dhe inteligjenca artificiale, si dhe mënyrat se si kompanitë po përshtatin strategjitë dhe po forcojnë reziliencën.
“Trade Corridors, Geopolitics and New Insurance Demand: Why Central Asia Matters in a Fragmented World” ishte tema e fundit e ditës. Sesioni analizoi ndryshimin e korridoreve tregtare dhe ndikimin e fragmentimit gjeopolitik në zinxhirët e furnizimit dhe investimet. Në fokus u vendos Azia Qendrore, e cila po shfaqet si një nyje e rëndësishme e lidhjes mes tregjeve. Sipas organizatorëve, zhvillimi i korridoreve ndërkombëtare të tregtisë po krijon kërkesë të re për sigurimin e riskut politik, kreditit tregtar, transportit të mallrave, ndërtimit dhe investimeve. Diskutimi trajtoi gjithashtu rolin e siguruesve dhe risiguruesve në financimin dhe mbështetjen e projekteve infrastrukturore dhe investimeve ndërkufitare.
