Në aksidentin e raportuar në aksin Fier–Levan, në zonën e Çezmës së Levanit, janë përfshirë tre mjete, dy automjete dhe një kamionçinë.
Sigurime.Online nuk përcakton fajësinë e drejtuesve të mjeteve dhe nuk merr përsipër të rindërtojë apo të përcaktojë dinamikën juridike të aksidentit. Përgjegjësia për përcaktimin e fajësisë dhe rrethanave të plota të ngjarjes u takon organeve kompetente, mbi bazën e provave dhe dokumentacionit përkatës.
Nga pikëpamja e sigurimit, ngjarja ilustron në vija të përgjithshme mënyrën se si mund të aktivizohet sigurimi i detyrueshëm i përgjegjësisë ndaj palëve të treta, ose TPL.
Si aktivizohet TPL?
Sipas kushteve të kontratës, TPL mbulon përgjegjësinë e drejtuesit të mjetit për dëmet që ai mund t’u shkaktojë palëve të treta nga përdorimi i mjetit, duke përfshirë dëmet ndaj pronës dhe dëmet ndaj personit, brenda kufijve të përcaktuar nga legjislacioni dhe kontrata.
Në një aksident me tre mjete, nëse pas hetimit përcaktohet se njëri prej drejtuesve ka përgjegjësi për shkaktimin e aksidentit, sigurimi TPL i mjetit të përgjegjësit aktivizohet për dëmet e shkaktuara palëve të treta. Këto mund të përfshijnë dëmtimin ose shkatërrimin e dy mjeteve të tjera, si dhe dëmet trupore apo shëndetësore të personave të dëmtuar.
Nëse nga hetimi rezulton përgjegjësi e përbashkët e dy ose më shumë drejtuesve, përgjegjësia e secilit dhe aktivizimi përkatës i mbulimeve të sigurimit përcaktohen në përputhje me përgjegjësinë e konstatuar dhe rregullat ligjore.
Përjashtimet
Një tjetër element i rëndësishëm është se TPL mbulon palët e treta, jo dëmin e shkaktuar vetë mjetit të drejtuesit përgjegjës. Pra, përcaktimi se cili sigurim mbulon cilin dëm varet nga rezultati i përcaktimit të përgjegjësisë dhe nga pozicioni i secilit mjet në raport me aksidentin.
Sigurime të tjera
Për dëmet ndaj pronës deri në 30 mijë lekë, nëse drejtuesit bien dakord për rrethanat e aksidentit, ata mund të plotësojnë dhe shkëmbejnë Raportin Europian të Aksidenteve, pa qenë e nevojshme të kenë procesverbalin e konstatimit të shkeljes nga Policia Rrugore. Kur nuk ka dakordësi, si dhe për dëme mbi këtë vlerë, kërkohet procesverbali përkatës i Policisë Rrugore, sipas kushteve të kontratës.
Për dëmet shëndetësore ndaj drejtuesit që do të mbahet shkaktar, do të duhej një sigurim nga aksidentet personale në mënyrë që shpenzimet e tij spitalore të mbuloheshin nga sigurimet. Po ashtu, mund të ndihmonte edhe një sigurim shëndeti bazë, me zgjerim mbulimi në ngjarjet aksidentale.
Për këtë arsye, në rastin e aksidentit të trefishtë në Levan, aktivizimi konkret i TPL-së për secilin mjet nuk mund të përcaktohet vetëm nga raportimet paraprake të ngjarjes. Ai varet nga dokumentacioni i aksidentit dhe nga përcaktimi i përgjegjësisë nga organet kompetente.
Mbulimet
Një veturë normale, nëpërmjet sigurimit TPL zhdëmton deri në 750 mijë euro dëme ndaj të tretëve, kamioni deri në 1.5 mln euro dhe autobotet deri në 2 mln euro.
