Sigurimi i detyrueshëm është një detyrim ligjor për pronarët dhe përdoruesit e mjeteve të transportit. Por çfarë duhet të dini konkretisht përpara se të qarkulloni me mjetin tuaj?
1. Sigurimi duhet të lidhet përpara përdorimit të mjetit
Pronari i çdo mjeti transporti është i detyruar të lidhë kontratën e sigurimit përpara se ta përdorë mjetin. Sigurimi duhet të rinovohet për aq kohë sa mjeti do të mbetet në qarkullim.
2. Pa provën e sigurimit nuk lëshohet certifikata e kontrollit teknik
Kur mjeti duhet të regjistrohet ose certifikohet dhe kërkohet certifikatë regjistrimi apo kontrolli teknik, pronari duhet të provojë me dokumente se ka lidhur kontratën e sigurimit. Vetëm pas kësaj autoritetet përgjegjëse lëshojnë certifikatën e kontrollit teknik ose dokumentin e barasvlershëm.
E njëjta kërkesë zbatohet edhe për subjektet që licencohen sipas ligjit “Për transportin rrugor”. Autoritetet përgjegjëse duhet të sigurojnë përmbushjen e këtyre detyrimeve.
3. Mungesa e sigurimit sjell gjobë
Nëse personi i autorizuar për kontrollin e trafikut konstaton shkeljen e detyrimit për të pasur sigurim, vendoset masë administrative me gjobë, sipas parashikimeve të Kodit Rrugor.
4. Sigurimi mbulon edhe përdoruesin tjetër të mjetit
Sigurimi i përgjegjësisë së pronarit për dëmet që u shkaktohen palëve të treta mbulon edhe dëmet e shkaktuara kur mjeti përdoret nga persona të tjerë, nëse këta e përdorin mjetin me miratimin e pronarit.
5. Gjatë qarkullimit duhet të keni me vete dokumentet e sigurimit
Pronari ose përdoruesi i mjetit duhet të mbajë me vete policën e sigurimit ose një provë tjetër të lidhjes së kontratës së sigurimit të detyrueshëm.
Për mjetet rrugore duhet të mbahet me vete edhe Raporti Evropian i Aksidenteve.
Ndërsa pronari ose përdoruesi i një mjeti lundrues duhet të mbajë me vete policën e sigurimit ose një provë tjetër të lidhjes së sigurimit të detyrueshëm.
6. Në rast aksidenti, duhet të jepni të dhënat tuaja dhe të sigurimit
Në rast aksidenti, drejtuesi i mjetit është i detyruar t’u japë të dhënat personale dhe të dhënat që lidhen me sigurimin e detyrueshëm të gjithë personave të përfshirë në aksident, të cilëve mund t’u lindë e drejta për të kërkuar dëmshpërblim.
Sigurimi i detyrueshëm në transportin rrugor është një detyrim ligjor dhe lidhet drejtpërdrejt me mbrojtjen e palëve të treta në rast dëmi.
